Lojë dhe argëtim
Lojra sportive, aktivitete kulturore, edukative dhe argëtuese zhvillohen çdo ditë për fëmijët që frekuentojnë qendrat ditore ARSIS dhe për fëmijët në komunitetet ku ata banojnë. Kalçeto është ndër aktivitetet sportive më të preferuara. 51 fëmijë të ndryshëm janë përfshirë në këtë aktivitet 1 ditë në javë sipas grup moshave. Dy nga fëmijët që spikasin për talentin janë mbështetur financiarisht për t`u trajnuar në një ekip profesional futbolli.
Volejbolli dhe ping-pongu janë gjithashtu lojra të preferuara të fëmijëve mbi 12 vjeç. Ndër aktivitetet që u ofrohen fëmijëve janë filmat. Çdo javë fëmijët përfshihen në ‘terapi filmi’ jo-formale. Filma të përshtatshëm sipas grupmoshave shfaqen dhe diskutohen në grupe nga fëmijët.Pas shfaqjes organizohen diskutime për temën, për aktorët dhe lojën e tyre, për preferencat e fëmijëve, për ëndrrat e dëshirat e tyre. Një praktikë e tillë jo vetëm argëton fëmijët, por edhe ndikon në formimin e shijeve të tyre artistike dhe estetike.
Gjatë gjithë muajve të ngrohtë, me fëmijët organizohen shëtitje dhe ekskursione në parkun e liqenit të Tiranës, në pika turistike brenda dhe jashtë Tiranës. Në aktivitetet verore përfshihen çdo ditë 40-50 fëmijë të moshës 12 -16 vjeç. Lojrat sportive, piktura e fytyrës, lojrat me tullumbace, futbolli dhe volejbolli, kukafshehti, etj, janë disa nga aktivitetet e preferuara.
Me fëmijët janë organizuar vizita në Muzeun Arkeologjik të Tiranës, në Galerinë Kombëtare të Arteve, në Muzeun Historik Kombëtar, në një galeri private arti, janë ndjekur shfaqjet e cirkut dhe teatrit të kukullave, janë organizuar ekskursione në kalanë e Petrelës, në fshatin piktoresk të Pezës, në qytetin historik të Krujës, etj. Të gjitha veprimtaritë e organizuara kanë synim të zvogëlojnë numrin e orëve që fëmijët shpenzojnë në rrugë dhe të sigurojnë një mjedis për zhvillimin e mëtejshëm të aftësive të fëmijëve.
